-->

شرح كل ما يخص معادلة كلية الهندسة

شرح كل ما يخص معادلة كلية الهندسة
    كتب وإمتحانات معادلة كلية الهندسة

    نبذة عن المعادلة

    * هي مسابقة بينظمها المجلس الأعلي للجامعات كل سنة علشان يدي فرصة تانية للطلبة علشان تدخل كلية هندسة واللي معرفوش يجيبوها مباشرة من ثانوية عامة او لكونهم ثانوي صناعي.
    * بيحط الإمتحانات اساتذة كلية الهندسة من مختلف الجامعات .
    * تعتبر ناجح ويتم قبولك في كلية الهندسة بمجرد الحصول علي 50% في كل مادة. 
    * فيه اربع كليات بيتم فيه الإمتحان وهي (هندسة القاهرة - هندسة كفر الشيخ - هندسة الزقازيق - هندسة أسيوط) فشوف انت التوزيع الإقليمي بتاعك يتبع جامعة ايه وهي دي الجامعة اللي هتقدم ورقك فيها وهتمتحن فيها بإذن الله.
    ودي توزيعة شوف محافظتك واعرف هتمتحن فين.

    شروط الإلتحاق بالمعادلة

    علشان تقدر تقدم في المعادلة لازم تكون حاصل علي واحد من المؤهلات دي:
    * دبلوم المعهد الفني الصناعي نظام الخمس سنوات بمجموع 50% فأكثر.
    * دبلوم المعهد الفني الصحي (شعبة صيانة الأجهزة الطبية فقط)  بمجموع 50% فأكثر.
    * دبلوم الجامعة العمالية سنتين (شعبة التكنولوجيا فقط).
    * دبلوم الثانوي الصناعي نظام الثلاث سنوات بمجموع 70% .
      ملحوظة 1 : طلبة المعاهد لديهم فرصة التقديم ثلاث مرات خلال الثلاث سنوات منذ تخرجه بما فيها سنة التخرج اما طلبة الثانوي صناعي نظام الـ 5 سنوات لديهم فرصة التقديم مرتين فقط خلال 3 سنوات من ضمنها سنة التخرج.


      مواد المعادلة

       بيتم اختبار الطلبة المتقدمين لمعادلة كلية الهندسة في 5 مواد وهم:
      1- الفيزياء .
      2- الرياضة الخاصة (التفاضل والتكامل) .
      3- الرياضة العامة ( الجبر والفراغية) .
      4- الميكانيكا (استاتيكا - ديناميكا) .
      5- اللغة الإنجليزية . ⇐ دي للناس اللي مقدمة من دبلوم ثانوي صناعي 3 سنين بس يعني الناس اللي مخلصه معاهد مش هتاخد الإمتحان ده هتمتحن الأربع مواد الاولي بس اما الثانوي صناعي هيمتحن الـ 5 مواد.

        الأوراق المطلوبة في التقديم

        استمارة الإلتحاق 
        • اصل شهادة التخرج وصورة منها
        • اصل البطاقة الشخصية وصورة منها.
        • 3 صور شخصية حديثة 4×6.
        • 300 جنيه رسوم التقديم في المعادلة. 
        دا رابط المجلس للأعلي للجامعات اتأكد منه بردو اضغط هنا 

        ملاحظة 2 : لو مش معاك أصل شهادة التخرج لكونك استخدمتها في التقديم لأي كلية تانية أو التقديم للجيش أو لأي سبب ما, تعمل ايه؟؟

        اطلع علي معهدك أو كليتك واطلب منهم بيان درجات بأكد تاني بيان درجات مش بيان نجاح علشان بيان النجاح مش بيتقبل , لازم بيان درجات علشان بيبقي فيه درجات مفصلة لكل مادة والمجموع والتقدير في حين إن بيان النجاح مش بيبقي فيه غير التقدير أو المجموع الكلي.

        ملاحظة 3 : الأصولات دي هتاخدها تاني متقلقش , الموظفين المسؤلين عن استلام ملفك وأنت بتقدم ورقك هيبصوا فيها بس علشان يتأكدوا من صحتها وهيدوهالك تاني وبعدين هياخدوا منك الصور.

        ويتم فتح باب التقديم الكترونياً ابتداءاً من منتصف شهر 7 ويمتد في شهر 8 وبعد كده يقفل التقديم الإلكتروني ويبدأ التقديم الورقي بداية من اول شهر 8 وحتي منتصف شهر 8 علي ان يتم اجراء الإمتحان في الأسبوع الأول من شهر 9  .

        ملحوظة 4: لازم تقدم إلكتروني علشان لو مقدمتش إلكتروني مستحيل ورقك تقبل في التقديم الورقي. 

        خليك فاكر تطبع استمارة الإلتحاق بعد ما تقدم علي النت علشان لو نسيت تطبعها مش هتعرف تقدم وهتعملك مشكلة لأن بعد انتهاء المدة اللي محددنها للتقديم الالكتروني الموقع بيقفل ومش هتعرف تدخل لصفحتك تاني .
        طيب لو في اللحظة اللي انت بتقرأ فيها كلامي ده كان الموقع قفل فعلاً ومطبعتش الاستمارة تعمل ايه؟؟
        متيأس وتقعد في البيت وتقول الموضوع انتهي لا منتهاش, لما يفتح التقديم الورقي حضر بقت ورقك وهينقصك بس الاستمارة روح الكلية اللي المفروض تقدم فيها وقول للموظف المسئول عن استلام الورق انك قدمت الكتروني لكن مطبعتش الاستمارة علشان نسيت أو مكنتش تعرف أو حتي حصل مشكلة ومعرفتش تطبعها وهما هيطبعهولك ان شاء الله. 

        ملحوظة 5 : احذر ثم احذر ثم احذر من انك تنسي رقم الجلوس بتاعك وانت رايح الإمتحان علشان في معادلة 2016 طردوا اكتر من 300 واحد من اللجان علشان مكنش معاهم رقم الجلوس رغم انهم معاهم البطاقة اللي تثبت شخصيتم واسمهم نازل في الكشوفات فأحياناً بيتخذوا اجراءات تعسفية كونها مسابقة 
        شوف انت لما تقعد تذاكر وتتعب سنة كاملة ويجي واحد يضيع عليك تعبك دا كله لمجرد ان مش معاك رقم الجلوس
        فأرجع تاني واقول اياك ثم اياك تنسي رقم الجلوس علشان متحطش نفسك في مشكلة ممكن تندم عليها طول حياتك.

        ملحوظة 6: متفكرش حتي انك تغش لأن نظام الإمتحان MCQ يعني اسئلة اختيار من متعدد الأسئلة بتكون كتيييييير جدا والوقت قصير يعني انت يدوب تركز في ورقتك وتحل كل اللي تقدر تحله كما 
        كما ان الأسئلة دي بيتم بيلغبطو ترتيبها ويعملو منها 8 نماذج هيا هيا الاسئلة ولكن بترتيب مختلف فأنت والـ 8 اللي حواليك كل واحد بيبقي معاه نموذج مختلف
        فأستعن بالله واعلم ان الله لا يضيع اجر من احسن عملا  فيش حاجة مستحيل ومفيش حاجة صعبة احنا اللي بنصعب الدنيا علي نفسنا
        اجتهد واعمل اللي عليك وسيب الباقي علي ربنا وفي الاول والأخر التوفيق دا بتاع ربنا  
        وكما قال الشاعر      "علي المرء ان يسعي وليس عليه ادراك النتائج" 


        لتحميل مناهج المعادلة اضغط هنا (قريباً)



        مجنون نت
        @مرسلة بواسطة
        كاتب ومحرر اخبار اعمل في موقع مقالات واخبار .
        1. لو سمحت انا طالب ثانويه عامع دفعة 2018 ممكن اقدم في المعادله دي ؟؟؟

          ردحذف
          الردود
          1. مينفعش تقدم بعد ثانوية عامة!!
            ابما انك ثانوية عامة (رياضة 2) انت كده قدامك 3 طرق
            لو مجموعك كويس ممكن تدخل معهد عالي هندسة أو معهد فني صحي شعبة اجهزة طبية وتكمل بعده هندسة
            ولو مجموعك ضعيف شزية ممكن تدخل معهد فني صناعي وتكمل بعده هندسة

            حذف
        2. الردود
          1. ربنا يخليك .. يارب نكون عند حسن ظنك دايماً

            حذف
        3. لو سمحتو انا اجيب الاستماره الاساسيه ولا صوره منها
          ومحتاجه مواد المعادله pdf ضرورى لو سمحتو

          ردحذف
          الردود
          1. الاستمارة دي اللي انت بتقدمها ع النت ودي كده كده بتبقي صورة لأنك بتطبعخا من النت
            انما شهادة التخرج لازم تبقي اصل او صورة طبق الاصل
            واتأكد لو جبت بيان نجاح يكون في درجات المواد موجود او تقديراتها مش مجرد ناجح وخلاص

            حذف