-->

كل ما تريد معرفته عن كلية رياض الأطفال

كل ما تريد معرفته عن كلية رياض الأطفال
    معلومات عن كلية رياض اطفال

    الحمد لله وكفي وصلاة وسلاما علي عباده الذين اصطفي اما بعد:
    مرحلة بعد انتهاء امتحانات الثانوية العامة سواء قبل وبعد وظهور النتيجة مرحلة مهمة جدا لازم تقرا فيها كويس عن كل الكليات اللي بتفكر تدخلها سواء كنت محددها او كنت لسه محتار علشان متدخلش كلية مش حاببها وتندم بعد كده

    علشان كده كنا بدأنا معاكم سلسلة اعرف كليتك واللي من خلالها بنقدملكم معلومات موثوقة عن كل كلية علشان تساعدك في تحديد وجهتك وتعرف تاخد قرارك

    النهارده هنتكلم معاكم عن كلية رياض الأطفال 


    كلية رياض الأطفال هي كلية دراستك فيها متعلقة بالأطفال تحت سن المدرسة يعني تحت ال6 سنين، هتدرس ايه بالظبط دي تعتمد على القسم اللي هتختاره.
    -الكلية فيها 4 أقسام: قسم عربي، قسم إنجليزي، قسم حضانة وقسم تربية خاصة.
    نظام الأقسام ده بيتطبق في الكلية من سنتين يعني في دفعتين اتطبق عليهم النظام ده.
    -مصاريف كل قسم عادة بتبقى 250 جنيه ما عدا قسم الإنجليزي مصاريفه 5000 جنيه والمصاريف قابلة للتغيير من سنة لسنة.
    -اختيار القسم بيبقى عن طريق تنسيق وتحديد رغبات والمجموع طبعا ليه دور زي تنسيق الثانوية العامة يعني كل ما مجموعك يكون أعلى هتختار القسم اللي إنت عايزه بحرية أكتر.

    أقرأ ايضاً

    أقسام كلية رياض الأطفال:-

    -أي قسم بالنسبة لسنة أولى بيبقى فيه 7 مواد لكل ترم يعني 14 مادة للسنة بتختلف من قسم لآخر.
    1-قسم العربي:
    بيعتمد على تخريج مدرسين للأطفال من سن 4:6 سنين يعني سن kg1, kg2 كده
    مواد القسم: موسيقي، رسم، چيم، حقوق الطفل و المواطنة، مدخل في العلوم التربوية، تدريب ميداني 1، تدريب ميداني 2، منهج الأنشطة، استراتيجية التعلم، علم نفس اللعب، التنمية الاجتماعية، النمو ومشكلات الطفل، عربي، انجليزي.
    قسم العربي بياخد من أعلى مجموع لإن هو القسم الأقدم في الكلية.
    2-قسم الإنجليزي:
    زي قسم العربي بالظبط وبردو بيعتمد على تدريس طفل في نفس العمر من 4:6 سنين بيختلف عن العربي في أن الدراسة فيه بتكون باللغة الإنجليزية.
    المواد نفس مواد قسم العربي بس باللغة الإنجليزية:
    Musical skills, artistic skills, Basic skills in physical education, Child right and citizenship, Introduction to educational sciences, Field training(1), Field training(2), Curriculum activities in kindergarten, Teaching and Learning strategy, Play psychology, Child social development, Physiological growth and problems of childhood, Arabic language, English language.
    دخول قسم الإنجليزي بيتطلب أنك تكون جايب في اللغة الإنجليزية في الثانوية العامة أعلى من 70% من الدرجة يعني حوالي 38 من 50.

    3-قسم حضانة:
    قسم الحضانة بيعتمد على تدريس كل اللي ليه علاقة بالطفل من ولادته لحد ما يكمل 4 سنين، وبيخرج مدرسين مسئولين عن الطفل في السن ده.
    المواد في القسم:
    تدريب ميدانى، تربية فنية، تربية موسيقية، تربية حركية، علم نفس، تربية أسرية، لغة عربية، لغة إنجليزية، تنشئة اجتماعية، حقوق و مواطنة، مهارات علمية.

    4-قسم تربية خاصة:
    القسم ده مختلف عن باقي الأقسام في إنه بيبعد عن الطفل العادي وبيهتم بالطفل اللي مش عادي.
    ازاي؟
    القسم ده بتدرس فيه كل اللي ليه علاقة بالأطفال ذوي الاحتياجات الخاصة زي الأطفال اللي عندهم إعاقات عقلية أو جسدية أو الأطفال اللي عندهم مشاكل سمعية أو بصرية، كمان أي طفل مختلف يعني كمان الطفل اللي ذكائه أعلى من طبيعي وأي طفل عنده موهبة غير العادي.
    برضه لازم الطلبة تاخد فكرة عن الطفل العادي زي باقي الأقسام.
    في سنة أولى و تانية بتكون الدراسة عامة بتدرس كل الإعاقات والموهبة المختلفة، في سنة تالتة بيكون في تخصص في أحد الإعاقات "عقلية، سمعية، حركية، موهبة وتفوق، صعوبات تعلم".
    القسم ده بيتطبق جديد في الكلية من سنتين تقريباً وعشان كده مجموع القبول فيه بيكون قليل أقل من باقي الأقسام.
    مواد القسم: تدريب ميداني١، مدخل تربية خاصة، سيكولوجية النمو النفسي، لغة عربية، مهارات فنية، المهارات الأساسية في التربية البدنية والرياضية، علم نفس اللعب، تدريب ميداني٢، مناهج تعليمية، أسس التربية الخاصة، التشخيص والتقويم في التربية الخاصة، تشوهات القوام، المهارات الموسيقية لذوي الفئات الخاصة، لغة أجنبية.
    - في سنة تالته وفي سنة رابعة كل طالب بيبدأ تدريب ميداني في المدارس علي حسب المدرسة اللي هيختارها في استبيان بيبقي في آخر نهاية سنة تانية بتكتب المنطقة اللي ساكن فيها وتختار المدرسة.
    .
    بالتوفيق ليكم و ايامكم اللى جايه حلوة ان شاء الله 

    متنساش تسيب رأيك في تعليق اسفل المقالة علشان تفيد غيرك بخبراتك
    ولو شايف ان البوست مفيد متنساش تعمل  شير لأى حد عايز يدخل كلية رياض أطفال 😍
    مجنون نت
    @مرسلة بواسطة
    كاتب ومحرر اخبار اعمل في موقع مقالات واخبار .

    إرسال تعليق